【小說《最後防線》】
【第二章 第一場的小戰役 (第三節)】
元仔暗暗高興﹐因為他發現耀哥已經恢復過來。
「走吧﹐元仔。」
「嗯。」
耀哥和元仔在走廊走著﹐元仔說﹕「其實咁樣趕走馬生﹐會唔會唔係咁好呢﹖佢客又多﹐自己又爛炒﹐對公司嘅營業額都幾有貢獻。」
耀哥說﹕「馬生這種做事手法遲早會出事﹐罰起上嚟可大可小﹐Nicky坐RO個位會俾佢連累。兄弟跟我搵食﹐我當然唔想兄弟出事。馬生這類不守規矩的經紀無咗就算喇﹐無乜咁可惜。至於營業額嘛﹐這可不是我現在最關心的事......」
耀哥沈默了一會﹐接著說﹕「我已經決定幫助青木。」
元仔看來連一點驚訝也沒有﹐好像早就猜到似的。
耀哥﹕「你不反對﹖」
元仔﹕「你考慮了那麼久﹐還是決定幫助他﹐當然是有理由的。」
耀哥﹕「你想知道我幫他的理由嗎﹖」
元仔﹕「什麼理由都好﹐總之我信你﹐我就站在你這邊。」
耀哥和元仔走到交易室門外﹐耀哥正要把門打開﹐忽然很認真的對元仔說﹕「多謝﹐多謝你的信任。但說真的﹐我都不知道自己的決定是否正確﹐我也不知道將來會有什麼事發生。」
元仔沒有答話﹐只聳了聳肩。
交易室內﹐各人正忙著自己的事情。
耀哥﹕「Nicky﹐我已經炒咗馬生。以後如果再有經紀唔守規矩﹐你自己決定怎樣做吧。」
Nicky﹕「係﹐知道。」
耀哥﹕「Edmond﹐你下星期一前幫我set up好個新位﹐要最新最快嘅hardware﹐貴啲都唔緊要。」
Edmond﹕「OK。有新人嚟學炒咩﹐耀哥﹖」
耀哥﹕「係就係有人嚟﹐不過唔係新人﹐更唔係嚟學炒嘢。將會嚟嘅人叫做青木。 」
豹叔本來正在專心做「功課」(請參閱【楔子 十五分鐘三十萬】)﹐一聽青木這名字﹐立即問﹕「青木﹖唔係以前盛峰嗰個呀嘛﹖」
耀哥﹕「就係佢。」
豹叔大奇﹐說﹕「吓﹖佢嚟我哋呢啲本地證券行做乜呀﹖」
耀哥﹕「呢個我遲啲先同你哋解釋。」
豹叔直搖著頭﹐一臉難以置信的表情。
(第三節完 ﹐第四節續)
(本故事純屬虛構﹐如有雷同實屬巧合)
沒有留言:
張貼留言