第二章 第一場的小戰役 (第一節)

【小說《最後防線》】

【第二章 第一場的小戰役 (第一節)】

2017年 三月某日 上午

「Nick哥﹐麻煩簽個名。」德寶證券的交收部文員阿偉把一份文件交給Nicky。

耀哥入股德寶後﹐安排Nicky當上了交易部的經理。

「又係馬生呀﹖」Nicky一邊簽名一邊說﹕「搞乜鬼呀﹐成日都要改單﹐check咗錄音未呀﹖」

「無錄音呀﹐馬生話個客打佢手提落盤。」

「妖﹐餐餐都係呢個理由。」

阿偉拿著簽好了的文件離開了交易室。

「喂﹐Nicky﹐小心啲喎﹐成日無錄音﹐證監叉㗎喎。」豹叔說。

「條友蠱蠱惑惑咁﹐係咪食啲客甲棍呀﹖贏就改單俾自己﹐輸就改單俾啲客。」Edmond望向Nicky﹐「真係要小心喎﹐你係RO(Responsible Officer)﹐有事要孭㗎喎。」

「我夠知要孭啦。可以點呀﹖唔俾馬生做呀﹖佢客又多﹐自己又trade得多﹐每個月嘅turnover都唔細喎。」Nicky一臉無奈的﹐「我又揸唔到fit﹐唯有等耀哥返嚟處理啦。話時話﹐做乜耀哥呢排成日唔喺公司﹖」

豹叔和Edmond都沒有回答這個問題﹐因為他們都不知道答案。

當耀哥還只是一個炒鬼的時候﹐他實在說不上是一個很有紀律的人﹐一星期總有一兩天﹐甚至兩三天不在公司﹐大家都見怪不怪。可是自從兩年前耀哥當了德寶的股東﹐他好像從來就沒有放過假﹐在辦公時間好像總能在公司找到他。

今年年頭開始﹐耀哥經常都不在公司。就算他在﹐也總是神不守舍。

「耀哥唔返嚟就唔使處理咩﹖你打個電話俾馬生﹐警告吓佢先啦。咦﹐啲內銀股今日得喎。」豹叔一邊留意著市況一邊說。

「你估我未打過咩﹖」Nicky已拿起了電話﹐「喂﹐馬生﹐Nicky呀。」

「講嘢。」馬生很不耐煩。

「你可唔可以呢﹐叫你啲客盡量打公司個電話落盤呢﹖因為呢﹐證監規定要有電話錄音呀。」Nicky客客氣氣的。

「X﹐咁小事﹐你收市先打嚟啦﹐阻Q住做嘢﹗」馬生一點都不客氣﹐而且已經把電話掛上。

「你老味吖。」Nicky忍不住罵了一聲。

「乜嘢事呀﹐Nicky﹖」

這把聲竟然是耀哥的﹐他今天竟然來了﹐眾人都感到意外。

Nicky把事情的原委告訴了耀哥。

耀哥知道後﹐撥了個電話給元仔。

過了好一會﹐元仔拿著一大疊文件來了交易室。

「耀哥﹐這就是馬生和他所有客人上一個月的月結單。」

耀哥接過那一大疊文件﹐仔細的看起上來。

自從耀哥跟青木見面後﹐元仔已經很久沒見過耀哥像現在這樣專心的處理事情。

(第一節完 ﹐第二節續)

(本故事純屬虛構﹐如有雷同實屬巧合)